सृष्टीचा जन्मसोहोळा

Sanjay Sonawani


सृष्टीच्या जननोत्सवाच्या....नवरात्रोत्सवाच्या सर्वांना हार्दिक शुभेच्छा.

नवरात्रीचे नऊ दिवस हे नऊ महिन्यांचे प्रतीक बनतात. घट्स्थापना ही सृष्टीगर्भाची शिव या चैतन्यातुन झालेली विश्वनिर्मितीची सुरुवात असते. घट हे जगन्मातेच्या ओटीपोटाचे प्रतीकरुप आहे. 

एका अर्थाने नवरात्रोत्सव आणि दसरा म्हणजे आपण सृष्टीचा जन्मसोहोळा साजरा करत असतो. तो स्त्रीच्या महन्मंगल मातृत्वभावनेचाही सोहोळा आहे.

या उत्सवाची सुरुवात कृषीवल संस्क्रुतीने करणे स्वाभाविक आहे. वर्षाकाल सरत असता, सुगीचा हंगाम ओसरत असता, नव्य चैतन्याची चाहुल मानवी मनाला लागणे स्वाभाविक आहे. 

आदिशक्ती ही आपल्या पुर्वजांनी भुमीच्या रुपात पाहिली. तीच मानवी जीवनाची गंगोत्री, आधार आणि अंतिम विश्रामस्थळ. मानवी जीवनाचे सृष्टीनियमांवर आरोपन प्राचीन काळी मानवाने केले. त्याला एक उदात्त अर्थ दिला आणि आपल्या जीवनप्रवाहाला सृष्टीशी नाळ जुळवुन घेणारी व्यापक दिशा दिली.

सृष्टीचा जन्म खरोखर कसा झाला याचा शोध विज्ञान घेत राहीलच. पण कृतज्ञ शैव कृषिवलांनी सृष्टीजन्माचे एक मिथ्थक रचले आणि हजारो वर्ष श्रद्धेने ते जपले हे महत्वाचे आहे.