आरामच आराम मिळे

१६ व्या लोकसभेच्या या निवडणुकीत भारतीय लोकशाहीच्या प्रगल्भतेचा आणखी एक पुरावा मिळाला असे म्हणायचे की भ्रष्ट, धोरणलकवा असलेले, सरंजामी, घराणेशाही नौटंकी सरकार घालवण्यासाठी लोकशाहीच धोक्यात आणणारे आत्मघातकी पाऊल जनतेने उचलले ? नेमके काय म्हणायचे? कांग्रेसचे समर्थन कोणत्याच अंगाने करता येणार नाही. पण मग मोदी सरकारने दाखवलेली स्वप्ने नेमकी कशी आहेत ते बघायचे की नाही? "अच्छे दिन आनेवाले है," "आरामच आराम मिळे" अशी जाहीरात केली गेली. याचा अर्थ आजपासून आता १२५ कोटी भारतीयांनी कामच करायचे नाही? त्यांना नमोजी आयत्या खायला घालणार?
 कांग्रेस भ्रष्ट होती यात शंकाच नाही. त्याचे शेकडो पुरावे आहेत. पण मग येडी युरप्पांना पक्षात परत घेणे, तिकीट देणे, ते निवडून येणे हे कशाचे उदाहरण आहे? नमोंनी प्रचारात ओतलेला हजारो कोटी रुपयांचा पैसा त्यांनी घाम गाळून मिळवला होता असे म्हणायचे काय?
राहूल-सोनिया ही मंडळी गांधी घराण्याची आहेत म्हणून कांग्रेसला गांधीघराणे मुक्त आणि देशाला कांग्रेसमुक्त करायचे आहे छान. पण मग आणिबाणीत संघपरिवाराला तुरूंगात टाकणार्‍या संजय गांधी यांच्या त्यावेळच्या उन्मत्त सहकारी नी पत्नी मनेका गांधी नी त्यांचा पुत्र वरूण हे केवळ भाजपासोबत असल्याने पवित्र कसे ठरतात?
महाराष्ट्रात १९०९ सालापासून गेली १०५ वर्षे एका सरंजामी जातीच्या हातात सत्ता आहे.सगळे राज्य त्यांनी बटीक बनवून टाकलेय. एनसीपी नी कांग्रेस म्हणजे या सत्ताधारी जातीचे राखीव कुरण आहे. सगळया महाराष्ट्रातून या मग्रूरांचा सफाया झाले हे चांगलेच झाले.
माननीय खळक-फट्याकराव यांचाही फुगा अखेर मराठी जनतेने फोडला तर....त्यांच्या अनेक उमेदवारांची अनामत रक्कम जप्त झाली आहे.
मनसे उमेदवारांना आतापर्यंत मिळालेल्या मतदानाची आकडेवारी :
1) नाशिक : डॉ. प्रदीप पवार - 63,050
2) पुणे : दीपक पायगुडे - 93,502
3) यवतमाळ - वाशिम : राजू पाटील - 26,194
4) शिरूर : अशोक खंडेभराड - 36,431
5) ठाणे : अभिजीत पानसे - 45,219
6) कल्याण : प्रमोद (राजू) पाटील - 1,22,349
7) मुंबई दक्षिण : बाळा नांदगावकर - 78,857
8) मुंबई वायव्य : महेश मांजरेकर - 66,020
9) मुंबई दक्षिण-मध्य : आदित्य शिरोडकर - 73,043
10) भिवंडी : सुरेश म्हात्रे - 93,647
संपुर्ण महाराष्ट्र ही आपली खाजगी जहागीर आहे अशा गुर्मीत वावरणारे आणि पत्रकार नी कार्यकर्त्यांवर सतत डाफरणारे मालक लोक यातून काही शिकतील काय?